九川福岡自由行-必食屋台惹味美食

係九州福岡又點可以唔去屋台試下呢?屋台係日本嘅路邊攤,好似香港嘅大排檔咁樣。係福岡,搵到最多屋台嘅地方就係中洲啦。去到福岡唔去屋台感受下呢度夜晚嘅氣氛,簡直係無去過福岡一樣呀。

今次我哋會介紹兩間屋台嘅,第一間係位於天神嘅小金ちゃん。小金ちゃん係天神嘅一個路口到,認住漢字小金就好容易搵到架啦。提提大家去我哋介紹嘅屋台,因為真係好受歡迎,同埋位置有限,所以預返半個鐘至一個鐘嚟排隊啦。

呢啲最出名就係呢個日式炒麵啦。炒麵比較濕身啲,而且拖住酸酸地嘅醬汁,麵身比較柔軟,配料例如紅蘿蔔同洋蔥比較爽口,所以食落去特別有層次感。炒面真係會比較酸,未必似平時我地係香港食到既惹味炒麵咁架~不過送酒就一流 :D

呢度另一個招牌菜就係明太子蛋卷啦。明太子嘅餡真係絕不欺場,超級多。可有蛋香之餘,明太子嘅味道都會慢慢滲出嚟。仲會越食越濃添,所以呢個都係一個必食之選呀。

小金ちゃん

福岡県福岡市中央区天神2丁目三井ビル裏親不孝通り入口 營業時間:1830-0200

第二間要介紹嘅屋台就係武ちゃん。武ちゃん位於中洲,去到認住個【武】字,同埋手作餃子呢四個字就會會搵到架啦。屋台嘅老闆非常好客,仲識講兩句廣東話架,所以去到就要同佢溝通下喇。呢度嘅餃子雖然細細粒,但係皮薄,餡唔係多但煎完之後好多汁,食落去非常之好味。

另外呢度嘅雞翼都好推介架,唔好睇佢外型普普通通咁,食落去真係超級多汁,唔會有雪味,加埋個燒汁真係perfect!

武ちゃん

福岡県福岡市中央区春吉 3丁目1

營業時間:1900-0230

提提大家~ 因為兩間分別都要排一陣隊架(30分鐘至1個鐘以上),如果無時間去哂兩間既話,我們兩個既口味都中意第二間的武ちゃん既餃子同雞翼多點,亦觀察到黎食既日本本地人都較多。

而小金ちゃん既炒面會比較酸,未必似平時我地係香港食到既惹味炒麵咁,不過炒面/鹹鹹的明太子(因為多料) 配啤酒就更夾,更體驗到屋台舉杯暢飲既熱鬧啊~

RECENT POSTS