和歌山白濱とれとれ市場－BBQ即烤海鮮、平嘆鯨魚、拖羅刺身

和歌山兩日一夜之旅當中，とれとれ市場係我地最最最期待既一餐！一齊睇下佢比起其他有名既市場（黑門市場、築地市場等等）有咩過人之處啦～：）由準備行程開始，已經見到好多人大讚とれとれ市場既刺身、海鮮丼，不過計我地話とれとれ市場既勝人之處係一定係－即買即燒海鮮！

市場簡介

とれとれ市場分別有濕貨區同乾貨區。

由正門入到去，左手面就係乾貨區，而右面就係濕貨區。

濕貨區有即買即食既身丼飯、刺身、壽司、燒好既海鮮等等，旁邊亦有food court既座位比人坐低食。一入到個區真係好香噴噴架，所以好多人比人吸引左去排除，但如果時間吾趕既，聽我地推介自己揀海鮮即燒！而另一邊呢濕貨區，就有生猛猛既海鮮，有象拔蚌、鮑魚、扇貝、大蜆、龍蝦、螺等等，我地覺得真係又平又新鮮：）

乾貨攤位以當地出產的調味料、制過既小吃為主，都可以睇下揀ｄ手信番去～

購買海鮮過程

買海鮮步驟好簡單～可以先行一圈之後揀好左想食咩之後，就可以去檔攤到落Order，通常都會分哂一份份，上面有哂價錢牌，有ｄ檔攤仲會有中文字。

落Order比左錢之後，大部分海鮮都要處理，例如開殼，切件等等，都會比張飛仔你，叫你5-10分鐘之後去拎。係呢個等緊既過程，可以去左BBQ場地個到拎定位，好多日本人都會選擇係到BBQ，所以都要等一陣架～

比大家做個參考，我地當日就買左：

一個海鮮盛合：3隻蠔、6隻扇貝、5隻螺 (¥3000)

一盒鯨魚刺身 (¥480)

一盒中拖羅刺身 (¥1300)

一盒甜蝦刺身 (¥600)

兩個人食呢個份量吾好以為好少，我地食到勁飽 :P

試食報告

係市場入口既右面，有一個自助燒烤場。入場費每位¥300，包碟子、筷子、燒烤夾同濕毛布，不過入面吾比帶飲品既，想飲既話可以現場買，或者偷偷地～哈哈～比錢之後就會有人同你開爐，咁就可以開始燒喇～

原隻燒蠔

即開即燒既蠔真係好鮮味，係相中都見到隻蠔漲卜卜，燒熟左吾太縮水，真係好大啖肉！

蠔咬落去帶淡淡海水味，同埋海鮮個種甜甜地既味道。真係一ｄ都吾腥！完全吾洗加檸檬汁，茄汁等等調味已經係好好食～（我地有試過加少少鹽上去燒作比較，如果吾落鹽既話會更顯鮮味）。想更好食既話，千其吾好燒太耐。我地個時專登見到佢微微變左實色，就夾起佢，岩岩熟既蠔入面係好Juicy，口感係滑滑地架～

燒扇貝

另一必食推介，扇貝肉質厚，又爽甜又彈牙～我地分左３次去燒，試下幾成熟先係最好食既：全熟、九成熟、八成熟。我地覺得其實只需要七－八成熟，就已經係呢個Size扇貝既最佳食用熟度，咁樣先會爽滑，多汁～而全熟就會變左''實的的''，少左肉汁。同燒蠔一樣，我地覺得吾洗落鹽都已經好有鮮味 :)

燒螺

呢度嘅燒螺超大隻！燒嘅時候螺會稍為縮少少，入面嘅海水就會係個殼入面滾。不過燒熟左既螺肉有少少難攞出嚟，記得慢慢係個邊撬佢出嚟呀～除左大隻之外，螺肉咬落去好彈牙，一啲都唔韌。食落去斬幾大陣海水鮮味架，所以記住唔好燒咁耐呀，因為螺殼入面浸住海水，越燒會越鹹。佢啲海水滾一陣就好食喇。

鯨魚刺身

我都兩個都未食過鯨魚嘅～其實，日本係少數會食鯨魚嘅國家，所以亂到就買少少試下。市場入面有鯨魚店，有唔同品種嘅鯨魚賣嘅，價錢都差唔多。食落嘅味道有啲似吞拿魚咁樣，不過可能係部位嘅問題，食落去比吞拿魚韌架～灘檔會叫你將鯨魚刺身會配埋海鮮醬一齊食 (包埋)，但我們覺得海鮮醬有啲咸，反而配返wasabi同豉油會夾啲。整體黎講，我地會試一次，知道個味就夠 :P

中拖羅刺身

市場入面有好多吞拿魚賣架～如果吞拿魚嘅脂肪含量越多嘅話呢，就係越上等，價錢都會貴啲架。但係我哋兩個覺得上拖羅油脂太多，食落反而太油。中拖羅就啱啱好啦。食落口好香油脂味而且好林，林到係口中溶化！拖羅嘅油脂慢慢溶化之餘，又唔會太過膩架！

甜蝦刺身

呢度啲甜蝦真係好抵食呀！一盒¥600 d蝦又大隻又多，蝦肉好鮮甜係基本啦，記得要啜埋個頭既蝦膏，真係會更加帶出蝦既鮮味！係市場經右邊最盡頭嘅舖頭買甜蝦，仲會送埋一大袋冰同埋發泡膠盒，咁就可以放埋其他海鮮唔怕行耐咗會變壞啦～

如果無地去和歌山玩既話，真係值得抽時間黎白濱！

除左とれとれ市場之外，仲可以去埋有名既三段壁、千疊敷同圓月島呢3個絕世美景～我地下一集會再介紹啊 :)

交通方法

可以選搭JR嘅黑潮特急，由京都站會經過大阪同和歌山站去到白濱嘅，時間超過兩個鐘頭以上。班次大概一個鐘左右一班。留意返JR嘅關西廣域pass成包埋白濱站你一程架，如果買咗關西地區pass要另外補錢架。即日來回嘅朋友留意黑潮特急返大阪嘅尾班車八點前就會開架啦。

去到白濱站出口左轉就係巴士站。建議大家可以係巴士站旁邊嘅售票處買1day pass (1100 yen)，搭三至四成多數都可以回本架喇。12，30，101，105號巴士都可以去到，車程大概五分鐘左右啦。上車嘅時候如果唔肯定，可以同職員或者司機講「to-re-to-re」，咁就唔會上錯車啦。

巴士公司同時有高速巴士來往大阪同京都架，但班次唔多，係慳錢窮遊嘅選擇。

巴士公司網頁:http://meikobus.jp/2016_3_26_shirahama_rosen.html

高速巴士班次: http://meikobus.jp/high_speed.html